«Theodas, tu resambles l'asne qui out le son de la viele ou de la harpe et riens n'i antant. Fox avoigles, conmant est ce que tu ne puez nule raison entendre, quar ta loy qui si est desfandue de tant de hauz homes ne fait se décroître non, et la nostre qui est douce et sostenue de povres vileins croit touz jorz et monteplie ? Ice te devrait faire avoir aucune conossence de vérité, quar tu puez bien veoir que se la vertu de Deu ni ovrast, nostre loy ne fust ja si sostenue et montiplié par .i. pou de povres vileins contre tant de roys et de contes et d'autres hauz homes qui toz jorz l'ont gerroié. »
Quant Josaphat li out monstrees ses paroles, si conuit Theodas la mauvaité et la foiblesce de ses dex. Et quant il se fu une pièce porpansez, si s'escria a haute voix et dit au roy: «Roys, li Seinz Esperiz habite veraiement en ton fil. Nos sûmes veincu, car il n'est mie nus qui por droit ne por raison poist aler en contre ce qu'il dist. Or aprimes conois ge que la forces crestiens est mont granz. »